1Sa 17 | ZomZIV | STEP | Tu-in Philistia-te in a galhatna uh gawmin galsim dingin Judah a Socoh ah a kikhawm uh hi. Amaute in Socoh le Azekah kikal a Ephes Dammim ah giahphual a sat uh hi.

1 Samuel 17

David le Goliath

1 Tu-in Philistia-te in a galhatna uh gawmin galsim dingin Judah a Socoh ah a kikhawm uh hi. Amaute in Socoh le Azekah kikal a Ephes Dammim ah giahphual a sat uh hi. 2 Saul le Israel-te zong kikhawm uh a Philistia-te do dingin Elah Kuam ah giahphual satin galsim dingin a kigual uh hi. 3 Philistia-te in mual khat ngah uh a, Israel-te in zong mual khat mah ngahin amaute kikalah kuam khat in a hal hi. ^a

4 A min Goliath kici a hatpipen Gath pana mi khat Philistia-te giahphual panin a pusiakkhia hi. Amah pi kua val ^{▼▼17.4 Hebrew ah tong guk le khap khat (meter 3 bang)} a sang hi. 5 Amah in sumngo lukhu khu-a, shekel ^{▼▼17.5 Tua in pound 125 bang (kilogram 57 bang)} tulnga a gik sumngo galdalna puan silh in; 6 a khete ah sumngo ngaltuam bulh a, a nungah sumngo teikhawh a pua hi. 7 A teipi bul siam lawngpi banga a teipi-paak sik in shekel ^{▼▼17.7 Tua in pound 15 bang (kilogram 7 bang)} zaguk a khai hi. A mai-ah a lum tawipa a pai hi. ^e

8 Goliath dingin Israel galkapte otsan a, “Bang hangin galsim dingin hong kuana kigual tazen na hi uh hiam? Kei Philistia khat ka hi hi, no Saul nasemte hi lo na hi uh hiam? Mi khat teel unla ka kiangah hong paisuksak un. 9 Amah in kei hong doin hong thahzawh leh ko na nasem uh kong suak ding uh a, ke’n amah zo a ka thahzawh leh no ka nasem uh suakin ka na uh na sem ding uh hi,” a ci hi. 10 Tua ciangin Philistia-pa in, “Tuni-in no Israel galkap uliante kong ngap hi! Mi khat hong kuansak un khat le khat i kisu ding hi,” a ci hi. 11 Philistia-pa kampaute a zak uh ciangin Saul le Israel-te khempeuh cimawhin a lauthawng uh hi. ^f

12 Tu-in David pen Ephrath-te Jesse min nei khat tapa hi a, amah Judah a Bethlehem pana mi ahi hi. Jesse in tapa giat nei-a, Saul hun lai-in amah upa ta-a, a kum zong tam ta hi. 13 Jesse tapa a upate thum galsimna ah Saul tawh gal a kuan khawm uh hi: A upa pen Eliab; a nihna Abinadab; le a thumna Shammah ahi hi. 14 David a nautum pen ahi hi. A ute thum in Saul zui uh a, 15 ahi hangin Bethlehem-a a pa tuute vak dingin Saul omna panin David kuan zelin a ciah zel hi. ^g

16 Ni sawmli sung Philistia-pa zing le nitakin paikhia-a a omna munah a va ding zel hi.

17 Tu-in Jesse in a tapa David kiangah, “Hih an kansa ephah ^{▼▼17.17 Tua pen seng khat 3/5 bang hi thei (litre 22 bang)} khat le hih anlum sawm na ute adingin a giahphual uah va puak in. 18 Amau pawl ^{▼▼17.18 Hebrew ah tul khat} ukpa tungah hih nawithaukhal sawm zong puakkhawm pah in. Na ute bang a ci uh hiam, va en kawm inla amau kiang pan thu kician ^{▼▼17.18 Ahikeh a kilasa pawlkhat; ahikeh kiciamna-a van kinusia} hong puak kik in. 19 Amaute Saul le Israel mi khempeuh tawh Elah Kuam ah omkhawm uh a, Philistia-te tawh kido uh hi,” a ci hi. ^k

20 Jesse hilhsa bangin David in a tuuhonte a cing khat tawh nusia-in a van guanga zingsang tungin a kuankhia hi. Galkapte awng uh a galsim dingin amau omna mun ciat zuana a kuankhiat laitakun giahphual a tung hi. 21 Israel le Philistia-te khat le khat kimaingatin a kigual uh hi. 22 David in vancingpa a vante nusiat a, a sanggamte hopih dingin galmai-ah a tai hi. 23 Amaute tawh a kihoho laitakin Gath pana a hatpipen Philistia-pa Goliath a panna mun panin a mai-ah paikhia-a a cih ngei teng ci-in awng a, David in a za hi. 24 Israel-te in mipa a muh uh ciangin laulua-in a vekun a tai uh hi.

25 Tu-in Israel-te khat le khat kiho-in, “Hih mipa a paikhiat pahpahna ahang na thei na? Israel a ngapthawh lua-a paikhia ahi hi. Amah a that zo peuhpeuh kumpipa in na tampi pia ding hi. Amah a tanu tawh kitengsak dinga, Israel sungah siahte zong a pa innkuan khempeuh a kimap ding hi,” a kici uh hi. ^l

26 David in a kianga ding mite kiangah, “Hih Philistia-pa that a, Israel maimawlna a beisak zopa bang kicih ding ahi hiam? A nungta Pasian galkapte a ngapthawh hih vun-at loh Philistia-pa kua ahi hiam?” ci-in a dong hi.

27 Amaute in ama tunga kigensa teng mah gen kik uh a, “Amah a that zo peuhpeuh hih bangin kihih ding hi,” a ci uh hi.

28 David sanggampa a upa pen Eliab in mite tawh a kiho a zak ciangin heh a, “Hih lai-ah bang hih a hong paisuk na hi hiam? Gamsunga i tuu tawmnote kua tawh nusia na hi hiam? Na kihai muanna le na lungsim gitlohna ka thei hi; gal kidona bek en dinga hong pai na hi hi,” ci-in a tai hi. ^m

29 David in, “Tu’n ke’n bang hih ka hia? A pau mahmah zong pau lo ding maw?” a ci hi. 30 A midang khat kiangah kiheisanin tua thu mah gen a, mite in a masa a bangin a na dawng uh hi. 31 David kampaute a kizak ciangin Saul kiangah kiko a, Saul in a samsak hi.

32 David in Saul kiangah, “Hih Philistia-pa hangin kuamah lungneu kei uh hen; na nasempa kuanin ka va do ding hi,” a ci hi. ⁿ

33 Saul in, “Hih Philistia-pa do dingin na kuan thei kei ding hi; naupangno lel khat na hi a, amah a khangno tunga kipanin galdo mi khat ahi hi,” ci-in a dawng hi. ^o

34 Ahi hangin David in Saul kiangah, “Na nasempa in a pa’ tuute cing den hi. Humpi le vompite hong pai-in ganhon lakah tuute a mat uh ciangin, 35 a nungah ka delh a, satin a kam panin tuute ka hukhia hi. Kei hong bawh ciangin a mulin ka mana satin ka that hi. 36 Na nasempa in humpi le vompi a nihin ka that hi; hih vun-at loh Philistia-pa in a nungta Pasian galkapte ngapthawh vial ahi manin hihte khat tawh kibang lel ding hi. 37 Humpi khecin pan le vompi khecin pana hong hukhia TOPA in hih Philistia-pa khut panin kei hong hu ding hi,” a ci hi. ^p

Saul in David kiangah, “Va kuan in, TOPA in nang hong ompih ta hen,” a ci hi. ^q

38 Tua ciangin Saul in ama galdal puan David a silhsak hi. Amah in galdal puan silhsaka sumngo lukhu a khusak hi. 39 David in galdal tungah namsau kuah a, amah’n tuate zongsang lo ahi manin kisinin a kawi paipai hi. ^r

Saul kiangah, “Hihte tawh ka pai thei kei hi, hihte ka zongsang kei hi,” a ci hi. Tua ciangin a suahkhia hi. 40 Tuateh a ciangkhut a khutin tawi-a, lui panin suangmai tang nga tawm a; tuate a ip gonggak sungah guangin a tuucin thungip sungah guangin pua a, suanglotna a khutah tawi-in Philistia-pa lam a manawh hi.

41 Tua laitakin Philistia-pa in a lum tawipa a mai-ah paisak a David lam manawhin a pai uh hi. 42 Amah in David enkai-a naupangno khat hi in, a cisan suak a mel hoih ahilam mu-a a simmawh hi. 43 Amah in David kiangah, “Ciang tawi-a nong kuan ui hong sa na hi hiam?” a ci hi. Tuateh Philistia-pa in a pasiante loin David a hamsiat hi. 44 Amah in, “Hih lai-ah hong pai in, huihlak vasate le gamlak ganhingte na sa ka pia ding hi!” a ci hi. ^s

45 David in Philistia-pa kiangah, “Kei hong do dingin namsau, teipi le teikhawh tawh nong kuan hi, ahi hangin nang hong do dingin kei na ngapthawh Israel galkapte Pasian, Thahatpen TOPA min tawh kong kuan hi. 46 Tuni-in TOPA in kei khutah nang hong pia dinga, nang hong sattukin na lu ka tan ding hi. Tuni-in Philistia galkapte luangte huihlak vasate le leitung gamsate ka pia dinga, leitung buppi in Israel sungah Pasian khat a om lam a thei ding uh hi. 47 Hih lai-a kikhawmte khempeuh in TOPA hotkhiatna namsau le teipi ahi loh lam thei ding uh a; galdona TOPA aa ahi manin note khempeuh ko khutah hong pia ding hi,” a ci hi.

48 Philistia-pa in amah do dingin neh semsem a, amah maituah dingin gal mai-ah manlangin David a tai hi. 49 A thung-ip sung sawkin suangtang khat lakhia-a a suanglotna-in a kap leh Philistia-pa taltang a kha hi. Suangtang a talah tum a leitungah a khuptuksuk hi.

50 Tua bangin Philistia-pa tungah suangtang khat le suanglotna khat tawh David gualzo a; a khut sungah namsau keng loin Philistia-pa sattukin a that hi.

51 David tai-in a tungah a ding hi. Amah in Philistia-pa namsau manin a paai panin a dokkhia hi. Amah a thah khit ciangin namsau-in a ngawng a tan hi. ^t

Philistia-te in a galhangpa uh a sih a muh uh ciangin kihei-in a tai uh hi. 52 Tua ciangin Israel mite le Judah mite awngin hondelh uh a, Gath ^{▼▼17.52 Septuagint khutgelh pawlkhat; Hebrew ah kuam khat} lutna le Ekron kongpite dongin Philistia-te a nungdelh uh hi. Gath le Ekron dong Shaaraim lampi dung tawntungah misi a kithehthang hi. 53 Philistia-te a delhna panun Israel-te a kilehkik uh ciangin a giahphual uh a luhsak uh hi. 54 David in Philistia-pa lutang la a, Jerusalem ah pua-in Philistia-pa galhiamte ama puanbuk sungah a koih hi. ^v

55 Philistia-te maituah dingin David a pai laitakin Saul in vil gige a, galkap ukpa Abner kiangah, “Abner aw, hua tangvalno kua tapa ahi hiam?” a ci hi. ^w

Abner in, “Nang nuntakna-in ka kiciam hi, kumpipa aw, ka thei kei hi,” ci-in a dawng hi.

56 Kumpipa in, “Hua tangvalno kua tapa hiam, thei dih un,” a ci hi.

57 Philistia-pa a thahna pan David a tun phetin Abner in sama Philistia-pa lutang tawisa in Saul kiangah a paipih hi.

58 Saul in, “Tangvalpa aw, kua tapa na hi hiam?” ci-in a dong hi.

David in, “Bethlehem a na nasempa Jesse’ tapa ka hi hi,” a ci hi.